Historia das nosas mulleres ourensás: ELVIRA SANTALICES MUÑIZ

24 enero 2016

ELVIRA SANTALICES MUÑIZ

Elvira Santalices Muñiz naceu en Ribadavia en 1919. Era irmá do pretixioso médico oftalmólogo Faustino Santalices Muñiz, e filla do gaiteiro galego e investigador zanfonista Faustino Santalices Pérez.

Así como seu irmán, Elvira tamén quixo realizar estudos superiores e estudou a carreira de Filosofía na Universidade de Santiago de Compostela onde consta matriculada no ano 1939 por oficial.

Non cabe dúbida, que tamén se labrou un futuro prometedor. Traballou en Facenda Pública e residiu en Madrid onde faleceu en 2011.

Vid: Cid Galante, Rosa María, Muller e educación en Ourense (1900-1930), Tese de doutoramento, Universidade de Vigo, 2006; El Correo gallego, 10 de agosto de 1939, p. 2.

NOTA DA AUTORA DO BLOG

Case a totalidade das entradas deste blog (en referencia ás entradas de mulleres históricas) son froito da investigación da autora e, polo tanto, teñen un carácter totalmente inédito e están rexistradas.Se alguén fai referencia a algunha delas sería preciso facer citación do blog. Así mesmo, todas as entradas realízanse coa maior rigorosidade posible, a través fontes diversas. Non obstante, e malia todo, non estamos libres de cometer algúns erros de precisión polo custoso que é reconstruír historias. Ditos erros, por suposto, son involuntarios e non froito do descoido. Solicito as desculpas previas. Se teñen a ben corrixirmas poden poñerse en contacto comigo UNICAMENTE a través do correo que figura no blog. Moitas grazas.

UNHA HOMENAXE ÁS NOSAS MULLERES

É un feito incuestionable que na historiografía contemporánea se suscitou un interese crecente polos estudos sobre a muller dende diferentes puntos de vista, o que permitiu reconstruír unha parte importante, ata agora silenciada, da nosa historia.

Se revisamos manuais de historia xeral, apenas aparecen mecionadas as mulleres. Pero, afortunadamente, isto vai cambiando.

Este blog pretende dar a coñecer a mulleres do noso contorno que tiveron relevancia pola súa traxectoria vital. Intenta poñer de relevo a aquelas mulleres ourensás, de antes e de agora, que fixeron e fan pegada na historia. Son nomes propios que debemos coñecer porque é un xeito de manifestar que a nosa provincia tamén participou na "visibilización" da Muller.

Nas mulleres citadas verémonos reflectidas ao compartir as súas inquedanzas, as súas ilusións, as súas loitas ...

Salientamos estas, aínda que, de ningún xeito, hai que esquecerse de tantas mulleres anónimas que en Ourense foron e son protagonistas na nosa vida cotiá e diaria.

Con probabilidade nunca este blog se completará de todo, pois cada día emerxen novos nomes propios dos que podemos sentirnos orgullosas.

Moitas grazas a todo o mundo por interesarse por este blog que se fai con moito cariño e respecto